KASUNYATANING SEPI
Yen rinasa
Sarwa prasaja
Mungguh ana sawijining ukara kang sinebat sepi
Pranyata tan prabeda miwah alaming pikir
Udakarane puluh-puluh
Pulunging ndaru tumiba madyaning ratri
Prasasat nglelimpe priyagung kang dhahar nendra
Ilang sipate titah kang sumarah
Pijer nggugu hardaning nafsu
Mboya kersa nyesep sarining sepi
Kareben nampi wahyuning Gusti
Sepi sepa sepahing ngaurip
Kudu anut jantrane wewaler
Sapa nerak bakal nlasak
Sapa ngidek bakal kasupatan
Yen wis mengkono tundhane gari rasa cuwa lan gela
Pituwase linambang ati peteng nyipati kahanan sing wis kebacut puyeng
Mula dadiya sirep menggahing sepi
Dadiya lelimeng menggahing sesaput pedhut
Paugerane tiyang nyenyuwun berkah
Kedah purun dhahar longan turu longan
---
Sugeng Joko Utomo, Tasikmalaya, 09-09-2018
Lingkar Sastra Gombong (Lisong)
