Weteng Kencot Wareg Puisi ?
Mbok Silah nginteri beras muter diputer ter goyang digoyang yang diseseg srek srek srek diumbulaken mbul mbul.
Mbah Jangga udud jegang maca puisi Lisong.
Mbok Silah nyeka kringet nang pipi banjur,
“Ramane, ndina-ndina koh mung puisi bae sing diadhep, apa enggane ora nyambut gawe apa?”
Mbah Jangga nyedhot udud klembak menyan hmmmm..... rasane kaya mabur meng wulan purnama,
”Biyunge sing ayu dhewek, menungsa kuwe butuh nyambut gawe, butuh mangan, sandang, papan, lan jiwane uga butuh keindahan, kebahagiaan, salah sijine ya lewat maca nulis puisi”.
“Ning angger kaya ramane menthelengi henpun maca nulis puisi bae, apa bisa wareg mangan puisi?”
Beras diinteri kaya menungsa mobat mabit disaring nang alam sapa becik mesthi ketitik ala mesthi ketara sapa wicaksana mesthi dadi pangarsa.
Udud klembak menyan tesih kemebul mabul-mabul, kukuse mumbul nembus payon nglewati uwung-uwung munggah angkasa samadya tumuju wulan sing lagi purnama, saperlu golet jawaban gunane puisi kanggo menungsa, apa puisi bisa maregi weteng kencot.
“Biyunge, titah menungsa duwe wujud badan wadag, awak daging balung getih, lan uga duwe pikir, rasa, cipta, karsa, lan jiwa.
Sega jangan lawuh woh-wohan lan umben-umben dadi panganane awak.
Seni kaendahan, kabagyan, agama kuwe dadi panganane jiwa. Maca nulis puisi Lisong kalebu pitamine rasa.
Wong sing rasane sering diolah seni kaendahan, bisa ngergani kaendahan alam, ngergani anane beda-beda suku agama budaya.
Wong sing rasa atine cupet ora dipakani seni kaendahan pikirane cupet dadi kejem bengis sadis seneng milara wong liya, angger wong liya beda suku agama budaya ora diurmati malah karepe ditindhes dikuasani”.
Biyung tulung-tulung wong padha liwung jiwane suwung,
Awang-uwung lakune pindha wong gemblung,
Jamane jaman gemblung, menungsa kaya gabah di-interi, muter diputer ter goyang digoyang yang diseseg srek srek srek diumbulaken mbul mbul.....
----
Basukine, Gombong 2018
Lingkar Sastra Gombong (Lisong)
