Assalamu'alaikum, tanglóng kudangdi
Saleuem uloen bri intan keugata,
Loen peu-ét saleuem keuticém nuri
Beu-ék Allah bri sampoe ban pinta..
Syahdat loen tuleh, didalam rawi
Meu'ah e dék ti, nyang uloen cinta,
Seu ot saleuem loen, e wahee Dek Ti
Loen nak meuturi, intan ngoen gata..
Beurayek ampon, keu loen nyang faki
Aéb ngoen keuji, dagang yang hina,
Allah adoë cut, poe bungong giri
Saleuem uloen bri, salèh mulia..
Saleuem loen laheé, ngoen haté suci
Bak ék Allah bri, sampoe ban pinta,
Han-ék loen pandang, bintang Jauhari
Tiwah baiduri, buleuen purnama..
Padum tréb sabé, haté loen sangsi
Uloen keumeung bri, surat keu gata,
Kareuna gata, e dék putéh di
Ureung gob turi, sukèe meunama..
Bintang keujora, cahya berseri
Hanlé jitém lhi, bak langèt donya,
Gaséh keu adék, han-ék loen kheun kri
Allahku Rabbi nyang thèe sibeuna..
Pucak Seulawah, dua sijoeli
Gunong nyang sakti, ateueh rueng donya,
Meunyo na tuah, iradah Rabbi
Sampoë Allah bri, beu sama sama..
Putéh haté loen, hai nyak putéh di
Surat uloen bri, keutanda mata,
Tanda seutia, cinta yang kawi,
Haté loen suci, intan keugata..
Teuma digata, e dék putéh di
Salèh cit pakri, keulóen yang hina,
Beukeuti na gaséh, bak gata nyak ti
Cuba adék bri, sipatah haba...
Hajat loen teuka, loen nak meuturi
Pakri loen tukri, sang malèe mata,
Meu'ah dèsya loen, tanglong kudangdi
Loen neuk meuturi, intan ngon gata...
Keureutah putéh, geulantoe diri
Daweuet hai ukhti, geulantoe mata,
Bèk, tabri aéb keulon, hai nyak ti
Sikrak uloen bri, narit rahsia...
Kapai teureubang, lam awan tinggi
Pulang peureugi, u Kutaradja,
Gaséh ngon sayang, intan putéh di
Surat cut bang bri, nak mupeue haba...
Alhamdulillah,leupah that suci
Allahku Rabbi, Maha Kuasa,
Beureukat do'a, karonya Rabbi
Beu-ék meuturi, geutanyoe dua...