# BACUT KISAH JAWONG WATEE GEUBANGKET
(Cae Kisah)
=======================
Jamak sineuna saleum lon tuju
Tapujoe Allah haba pembuka
Rahmat Sijahtra Nabi akhiru
Hana trep tapreh karap puasa
Buleun Mulia jinoe ka dikeu
Meunchen hatee lon keumeuk meurika
Seun-seun sibanja lon tuleh buhu
Watee geubangket geutanyoe teuma
Jasad teuhampa di ateuh kubu
Hana lom meugrak hanjeut meuhaba
Jawong dilua nibak nyak waqtu
Allah Geufirman " Hoe bandum gata"
" Tamong lom lanja dalam jasadu "
Sinan lom meugrak badan ngon mata
Udep keudua lagee nyan laku
Jilop ngon mangat jawong 'Ulama
Meunan chit sama jawongnya Teungku
Ahli ibadat meuhat tan goga
Ngon meuseulinya tan sapu-sapu
Jawong simaksit nibak nyan masa
Sosah lagoina sinan meureunue
Jawong menghadap akan Ta'ala
" Eya Rabbana waya Tuhanku "
" Bek neuyu tamong ulon lom teuma
Nibak badannya si maksit itu
Kalheuh jra kamoe sideh di donya
Jipubut mungka ji ikot naksu"
Allah geubantah nibak nyan masa
Geujaweub haba akannya Ruhu
" Pakon phon gata bak awai mula
Tabantah hana watee phon Lon yu?"
" Awai Ya Allah tan kamoe duga
Akan nyan hamba hana meuteupu
Lheuh ji ek saksi BALA SYAHID NA
Lon Tuhan gata, neukheun ALASTU?"
Akhe jih jawong si ahli Mungka
Ngon kureung Rela jitamong laju
Meujak lom badan lam Padang Mahsya
Meulawok teuma rata penjuru
Jinoe hai rakan takoh calitra
Tacok simpeuna ngon mau'idhatu
Ternyata jawong hana jirela
Tapubut mungka walau sigeutu
Tanyoe yang hudep mantong na masa
Taubat Nashuha beujinoe laju
Bek sampoe singoh Blang Padang Masya
Meunyeusai teuka arti tan meupu
Seulama Hayat tanyoe mantong na
Beuta keurija meunyang Allah Yue
Sinoe lam donya TANYOE SEUMULA
Akhirat teuma Allah bri Hayeu
=======================
Lhokseumawe, 16 Mey 2018
Terimakasih sudah berkunjung dan membaca hikayat Aceh sampai jumpa di lain kesempatan, jangan lupa upvote, resteem and follow
