Ako nga Klase sa Babayi
Suma pa nila dili angayan linyahan ug laki
Ang akong dagway, lihok ug postura
Kulang sa kolorete, dagway mas lalaki pa’s ilaha
Wala gaugot sa mga pulong nga ing-ini
Kay hugot pa’s lukot ang akong pagtuo
Nga ang pagkababayi sobra pa’s panggawas nga anyo
Ug kung ako man, ako dili mabulahan
Maspilion ko nga magtagad sa tinuod
Kaysa magdali asta ako mahurot, maunlod
Ang akong ngabil luspad pa’s gata
Pero kung ako mamulong, ikaw gayod mamati
Kanindot, kamatuoran, kaalam, imong masinati
Maglakaw madasig, kulang sa kiay ug sa sipa
Apan sa sistema nga bulok ug puno sa kasaypanan
Ako duna’y barog ug kini akong ginapanindugan
Ug dyutay lang ang nakasaksi lapus sa akong lawas
Pulong ko ug buhat ako lamang ginaayon
Sa gugma kong takos ug labing magayon