Conversamos com Ana Santiso, artista encarregada dos desenhos das criaturas da primeira colecçom de cromos de Tarasca DAO, “Criatura Míticas do Mundo”. Ana é pintora profissional, vive numha pequena aldeia do rural galego, e está começando a adentrar-se nos usos da corrente de blocos para a criaçom artística.
Ana, diante de umha obra sua.
Bom dia Ana. Como te apresentarias a ti mesma?
Bom dia. Eu considero-me umha comunicadora visual, e a minha linguagem é o desenho. O meu trabalho consiste em comunicar umha ideia através da imagem.
Como definirias o teu estilo?
Uff… é que, precisamente, nom tenho um estilo definido. O estilo hoje para umha desenhadora é como a marca para umha empresa, deve ser reconhecível. E isso é um lastre para a criatividade. Para mim o estilo está em constante evoluçom, adapta-se a cada novo projeto e recolhe a experiência dos anteriores. Nom cho podo definir, o estilo som eu, a minha maneira de ver o mundo e o meu jeito de contá-lo.
Tés trabalhado muitas técnicas diferentes. Ilustraçom de livros infantis e adultos, quadros, murais, banda desenhada, ilustraçom digital… Que tal te levas com a tecnologia e os novos soportes para as obras de arte?
Resulta-me umha ferramenta imprescindível. Como complemento de outras técnicas soluciona problemas e agiliza o trabalho, alarga possibilidades e melhora resultados. Como técnica em si mesma, reconheço que eu a emprego de umha forma bastante analógica, buscando quase sempre umha estética manual. Levo um par de anos fugindo das técnicas digitais, menos horas diante do computador, o contacto com o papel, com o pincel… sinto-me muito mais à vontade trabalhando assim.
Conheces o bitcoin e a tecnologia da corrente de blocos desde hai muito tempo?
Soubem antes deste projecto que da corrente de blocos. Agora sei algo mais. E parece-me abraiante, a verdade.
Como chegache entom a participar no projeto de Tarasca DAO?
Foi alá por Julho, um dos membros da equipa de Tarasca DAO propujo-me ilustrar a primeira colecçom de cartas. O tema, seres legendários dos povos do mundo, resultava-me mui apetecível. E pareceu-me umha boa oportunidade para conhecer novos meios, como a tecnologia da corrente de blocos, que podem supor novas oportunidades e jeitos de trabalhar e colaborar. Considero umha sorte enorme que esta panda de profissionais contassem comigo.
Fala-nos um pouco da colecçom, Criaturas Míticas do Mundo.
A colecçom tenta ser umha pequena mostra da riqueza e da diversidade cultural dos povos, achega-nos a eles através da sua tradiçom oral e dos seres que protagonizam as suas histórias. Daquelas histórias venhem as nossas. E conhecendo-as aprendemos acerca da nossa origem, pois provenhem dos relatos mais ancestrais dos que ficam vestígios.
Trabalhos de investigaçom e bosquejos do Lisovik
E qual é o estilo que lhe queres dar?
Existem quantidade de colecçons de temáticas variopintas que funcionam do mesmo jeito que a nossa, e diria que todas empregam técnicas digitais. Por suposto hai estilos mui diferentes, mas a maioria coincidem em que som imagens mui simples ou pouco elaboradas. Cingem-se a umha fórmula singela que permite inventar novas imagens simples e elaborá-las rapidamente. Eu, agora que me enfrento à criaçom de 50 ilustraçons e vendo o tempo que me leva, entendo que funcionem assim. Em todo caso, nós apostamos na qualidade artística e a riqueza de conteúdo.Queremos que essa seja a nossa senha de idetidade, por dizê-lo de algumha maneira. Para esta colecçom pareceu-me ajeitado empregar a técnica da aguarela, polo seu aspeto natural e espontáneo. Está usada dum jeito limpo e contido, em composiçons ordenadas e equilibradas, nas que aparece sempre a personagem a algum elemento relacionado com ela, de umha planta a umha paisagem. Busco umha imagem estática, quase decorativa, como as artes populares.
Pintura original do Lisovik
Podes-nos dar algum detalhe mais sobre a colecçom?
Nom. Prefiro recomendar-vos que invistades uns poucos euros em Ignis [a moeda digital que se emprega para comprar as cartas] e descubrades a colecçom por vós mesmos. Asseguro-vos que será umha viagem entretida pola mitologia universal. Num início serám 50 criaturas, dez por continente. Ah! E, mui importante, existe um prémio em metálico para todos os que completem a colecçom.
Já tés pensadas outras colecçons a maiores desta primeira?
Por suposto que haverá mais colecçons e jogos, é possível que eu me encargue de ilustrar algumha outra, mas em princípio buscaremos a colaboraçom de mais criadores. Já temos algumha temática em mente para a próxima colecçom, mas nom direi nada, por se no-la cópiam…
É todo por esta vez. Muito obrigado, Ana, por atender-nos, e até logo!
Obrigada.