6 dekabr, 1920-ci il. İtaliyalı general Mario Lombardonun kiçik qızı Rosalia ispan qripindən dünyasını dəyişir. Hələ 2 yaşında olan qızının ölümünü qəbul edə bilməyən general Rosalianı ölümsüzləşdirmək qərarına gəlir. Buna görə yaxın tanışı olan həkim Alfredo Salafiaya müraciət edən Mario Lombardo ondan qızını mumiyalamasını xahiş edir. Həkim generala söz verir ki, onun xahişini yerinə yetirəcək...
Sözünün üstündə duran Alfredo Salafia Rosalianı mumiyalaşdırır. General iki yaşlı qızının cəsədini evində onun üçün hazırlatdığı şüşə tabutun içində saxlayır. Rosalianın mumiyası Mario Lomardo üçün təsəlli olur.
Hazırda Rosalia Lombardonun mumiyası Palermoda saxlanılır. Artıq 85 il keçməsinə baxmayaraq, Rosalianın bədənində heç bir dəyişiklik yoxdur. Elə bil, o, uzun bir yuxuya gedib və əl vursan ayılacaq... Hər il onu görmək üçün Palermoya üz tutan tursitlər Dünyanın ən gözəl mumiyasına heyran qalırlar.
Bəs həkim Alfredo Salafianın gördüyü işin sirri nədə idi? Necə oldu ki, onun mumiyalaşdırdığı qızın cəsədində heç bir dəyişiklik baş vermədi? Bu sual bir çox mütəxəssisləri maraqlandırdığı üçün Rosalianın bədənində müxtəlif testlər həyata keçirilib. Nəticədə məlum olub ki, iki yaşlı qız damara yeridilən xüsusi maddə ilə mumiyalaşdırılıb. Lakin həmin maddənin nələrdən ibarət olduğu da mütəxəssislərə məlum deyil...