ជាធម្មតា Apple តែងទម្លាក់តម្លៃ iPhone ស៊េរីមុនៗ នៅពេលដែល iPhone ស៊េរីថ្មីបង្ហាញខ្លួន។ យ៉ាងណាក្ដីផ្អែកតាមរបាយការណ៍បានពីសង្វាក់ផលិតកម្ម ឲ្យដឹងថា Apple អាចនឹងទម្លាក់តម្លៃ iPhone សម្រាប់ដើមឆ្នាំ ២០១៨ ខាងមុខ។
<figure>
</figure>
ដំណឹងនេះចេញផ្សាយដោយសារព័ត៌មាន Digitimes។ សារព័ត៌មាននេះបានចុះផ្សាយថាចំនួនលក់ iPhone X នៅសិង្ហបុរី, តៃវ៉ាន់ និងសហរដ្ឋអាមេរិក មិនខ្លាំងដូចជាការរំពឹងទុកនោះទេ។ អ្វីដែលចាប់អារម្មណ៍បំផុត នៅត្រង់ដែលសារព័ត៌មាននេះលើកឡើងថា Apple នឹងកែសម្រួលតម្លៃ iPhone នៅដើមឆ្នាំ ២០១៨។ យ៉ាងណាក្ដី Apple មិនបានចេញមុខបញ្ជាក់ពីពាក្យចចាមអារ៉ាមនេះឡើយ។
ប្រភពខាងលើមិនបានបញ្ជាក់ច្បាស់ថា Apple នឹងកែសម្រួលតែតម្លៃរបស់ iPhone ស៊េរីចាស់ៗ ឬ ក៏កែសម្រួលលើ iPhone X ដែរនោះទេ។ អ្វីដែលច្បាស់នោះគឺ ការកែសម្រួលតម្លៃ iPhone X ដែលទើបចេញលក់បានប៉ុន្មានខែ អាចធ្វើឲ្យអតិថិជនដែលចាយលុយដល់ខ្ទង់ ៩៩៩ ដុល្លារ ទិញស្មាតហ្វូននេះ មិនសប្បាយចិត្តប៉ុន្មានទេ។
<figure>
</figure>
យ៉ាងណាក្ដី Apple ធ្លាប់ធ្វើបែបនេះម្ដងរួចមកហើយ កាលពីឆ្នាំ ២០០៧ ជាមួយនឹង iPhone ដំបូងបំផុត ដែលបានទម្លាក់តម្លៃពី ៦០០ ដុល្លារ មកនៅត្រឹម ៤០០ ដុល្លារ បន្ទាប់ពីចេញលក់បានត្រឹម ២ ខែ។ ដើម្បីជាការប៉ះប៉ូវ Apple បានចែកកាត ១០០ ដុល្លារ ដល់អតិថិជនមុនៗ ដើម្បីទិញផលិតផលនៅហាងរបស់ខ្លួន៕
Posted from my blog with SteemPress : http://khmernewsshare.com/archives/9035