Bak siuroë meurumpok bui ngôn peulandông di miyup bak kayèè. dipeugah haba teuk dua jih nyan.
Kheun Peulandôk : “Lam dönya nyoë, manusia nyang paléng teuga, hana nyang leubèh nibak seulaén manusia.”
Jaweub Bui : “Peue kapeugah nyan, hana kupatèh. Meunyoë manusia leubéh teuga nibak kèè, ci kapeulumah, nyang toh manusia nyan? Ngat kupeuhabèh cuco-cuco jih.”
Khuen Peulandôk lom : “Singôh beungôh kateuka u rumöh kèè ngat kupeuleumah nyang toh manusia nyan.”
Ban singôh jih, jan reunéum katrôk bui u rumöh peulandôk. Jih han ubah janji keuneuék kalôn manusia nyang jipeugah lé peulandôk. Masa nyan laju jiba bui lé peulandôk lam uteuén bak binèh jalan nyang seurèng jilewat lé manusia. Na siat leumah sidroë aneuék miét, aneuék sikula.
Jitanyông lé bui : “ Nyan nyang ka khéun manusia? Meunyoë nyan jih sigö kukông reubah teugageuéng.”
Jaweub Peulandôk : “Nyan gohlom manusia, keumeuéng jéut keu manusia.”
Peulandok peunget bui sumber
Na siat leumah ureuéng tuha bungkông geujak meutungkat. Jitanyông lom lé bui : “Peu nyan nyang ka khéun manusia? Meubacut kucukèh meubalék lam luéng.”
Seuôt Peulandôk : “Nyan ka leubèh manusia, bah tajak ho laén mangat meyrumpôk ngôn manusia.”
Ban dua binatang nyan jitamông lam uteuén. Dueh jikalön sidroë pawang rusa. Bak bahö meusandang budè, bak keu-ièng peudeuéng.
Kheun Peulandôk : “Nyan keuh nyan manusia, ci kalawan, kèè han kutijéut, bah kumeusom sinoë.”
Jaweub Bui : “meunyöe nyan manusia kèè hana kutakôt, ka kalôn jinoë kukièng reubah jih.”
Lhueh jikhéun meunan, laju jipluéng bui jilét pawang rusa. Golom tröh jireungkhôm ka jitimbak lé pawang rusa keunông bak pruét. Jitajö sigö tréuk, jihapit peudéung, putôh geilinyuéng bui siblah. Bui pih jipluéng bak peulandôk.
Jitanyông lé peulandôk : “Cuba kapeugah, kiban kri ngôn manusia !”
Jaweub lé bui : “Phôn-phôn kutajö jibeuôt jaroë jih, jitunyôk atéuh kèè, teubièt apui keunông pruét kèè. Sakét lagoina.”
Tanyông lom lé peulandôk : “Lheun nyan kiban lom?”
Jaweub bui : “Kutajö sigo tréuk, jitarék tuleuéng rusôk jih sikrèk, jihapit putôh geulinyuéng kèè siblah, sakèt that-that, kupluéng laju keunoë bak kah.”
Teuma kheun peulandôk : “Kon ka kupeugah roh bunöe kôn, tan soë ék lawan manusia. Kon meuntanyoë, gajah ngôn singa pih ék jidrop lé manusia. Peulom kah bui raya pruét.”
Seujak uroë nyan keuh bui jitakôt keu manusia, han jitijeut ngièng sagai ateuéh manusia. Beurangkaho dijak bui sabé-sabé jikalôn u miyup.