"Syair nyoe Khusus keu ngoen-ngoen lon yang na di Aceh"
Salamalaikom, Warahmatullah
Saleum loen seurah, Keu wareh Dumna
Leupie ngon tungang, Beuhoe ngon cungkah
Loen sapa bagah, Wareh seumua.
Hai jak loen dodi, Bujue oe'n Lipah
Angen di siblah, Leupie lagoina
Bak kawoem Teungku, Meuah loen peusah
Bak Ummi Ayah, Meunan ciet sama
Kadang lawet nyoe, Uloen ka salah
Hana amanah, Lagee seumpurna
Wasit yang neubie, Sudie loen bantah
Durhaka ngon ayah, seureuta Poma
Foto: Poma long dan Ma aneuk miet.
Dak juet teu'ot, Poma loen reupah
Loen keuneuk peusah, Jeunaweub haba
Kadang lawet nyoe, Uloen ka salah
Han ek loen balah, Sanjong jasa Ma
Wahee oe poma, Poma meutuah
Peumeuah bagah, Desya Aneuknda
Ka lazem Jeuheut, Dalam Buet salah
Tuwoe peunayah, Ureung syiek dua
Sayang pisang Beung, Saleung ka reubah
Jantong ka bicah, Meutimpa Teuga
Sayang Aneuknda, Eo Poma lam apoh-apah
Rayoek that salah, Yoh wate Muda
Bak buluen suci, Bak uroe Fitrah
Hate teucurah, Meulinang Mata
Bak mieng sang jilee, ie mata darah
Uloen ka pasrah, Ngon hate rela
Teuma oh lhueh nyan, Hai rakan sahbah
Meunan ciet kisah, Ngon uruemg gata
Kadang teulanjoe, Tutoe loen Leupah
Haba loen peugah, Kadang na lanja.
Foto: Rakan-rakan FAMe Bireuen.
Uleh seubab nyan, loen pinta bagah
Ubena salah, Peu meuah Teuma
Kadang na tutoe, Uloen yang leupah
Kadang ciet tingkah, Seumena-mena
Eo kruseumangat, Rahmat meulimpah
Neubie lee Allah, Keu tanyoe hamba
Nyoe uroe raya, Tinggai silangkah
Uroe yang Fitrah, Meuteugor sapa
Nyan uroe raya, Rakan Meutuah
Uroe yang sep pah, Meutatap Muka
Meunyoe umue, Neubie lee Allah
Beu troh neu langkah, Kunjong syedara
Pintoe tan loen toep, Sabe loen Peuhah
Meusoe yang singgah, Uloen leung tika
Keudeh u dalam, Uloen yue langkah
Loen bie ie Mirah, Ngoen Asokaya!
Seu-alakada, Loen bie Pue Mudah
Yang peunteng titah, Janjoeng syedara
Silaturrahmi, Bek sampee pisah
Ta jalen Ukhwah, Ban meu adoe 'a
Bak Ma aneuk miet, Peusan loen Peugah
Kueh Keukarah, Loen yue seudia
Meunan ciet Supet, Bulukat Mirah
Ta woet jue bagah, Nyan Dodoi haluwa
Foto: Ma aneuk miet
Oh noe keuh dilee, Si rampoe haba
Meupat yang lanja, Neu teugor bagah
Meunyoe na tutoe, Pudoe ngon salah
Meuah Meutuah, Bak Urueng Gata.
Minal Aidhil Walfaidhin.
Mohon Maaf Lahir Dan Bathin
(Ifwadi, S. Pd & Keluarga)