Sa mga araw na nilulunod ka ng agam-agam
Na baka ikaw ay mapalitan
At maiwan
Na ikaw ay pinagtataksilan
Na meron ng ibang namamagitan..
Kapag naghahari na ang kapangyarihan ng selos
Pakiramdam mo ikaw ay nauupos
Pasensya mo'y unti unti nang nauubos.
Kapag ang selos ay lumalamon
Ng pinuhunang relasyon
Ng pagtitiwala, pag-asa, at pagmamahal na inipon
At ipinaglaban ng ilang taon.
Kapag nasaid na ng selos.
Kapag winawasak na ng selos.
Kapag binabagsak na ng selos.
Kapag sinasaksak na ng selos.
Kapag mas matimbang na ang selos
Kesa sa pakikinig
Pag-unawa
At pagtitiwala..
Kapag ang selos
Ay nagdidikta na
Na "sumuko na!"
Mahal, baka pwede namang
Pumikit ka muna nang ilang segundo lang..
Alalahanin mo muna
Kung paano tayo nagsimula.
Kung paano natin ipinangako sa isa't isa
Na ilang beses man tayong mag-away
Ay di tayo aayaw
Ay di tayo mag-aaya
Na tuldukan na.
Mahal kung sumusuko ka na
Kung tinatalo ka na
Ng mga pangamba
At maling hinala..
Baka pwedeng ipunin mo muna
Ang lahat ng tula na aking ginawa
Para sa'yo na aking pinakasisinta.
Basahin mong muli.
Damhin mong muli.
Alalahin mong muli
Kung paano mo ako kiniliti
Kung paano ako nagpakabaliw
Kung paano kita inaliw
Kung paano mo rin ako inaliw.
Kase mahal, hanggang ngayon ay ganon pa rin naman ang paggiliw.
Kase mahal
Ako pa rin naman ito.
Ako pa rin ito.
Yung lalaking takot na mag-isa sa kwarto
Na buti na lang ay nakilala ka
Na takot ring pala
Na pumikit pag hindi ako ang kasama.
Ako pa rin naman ito.
Ako pa rin ito.
Yung dahilan kung bakit may mga espasyo
Sa pagitan ng mga daliri mo
Para hawak-kamay tayo
Na brasuhin ang mundo
Na banggahin ang pader
Na haharang sa pagitan ko at sayo.
Ako pa rin naman ito.
Ako pa rin ito.
Kaya mahal huwag mo agad papatulan
Yung napanaginipan mo kagabi
Na may iba sa aking kandungan.
Yung eksena sa teleserye o pelikula man.
Yung ibinubulong sa'yo ng tsismosang kaibigan.
Yung hula sa'yo ng manghuhulang di dapat pinagkakatiwalaan.
Huwag mo silang ikabit sa ating karanasan.
Marami na tayong pinagdaanan
Kaya huwag kang papatalo sa selos na yan.
Dahil ako pa rin naman ito.
Ako pa rin ito
Yung nangakong ikaw lang ang gagawin kong pinakasentro ng aking mundo.
Mahal, tayo ay mag-aaway
Pero hindi tayo aayaw
Kase ako pa rin naman ito
Ako pa rin ito
Yung pipiliing "ako pa rin at ikaw"
Yung pipiliing ikaw pa rin ang kaulayaw
At kasayaw
At kasabay
At kaakbay
Hindi mangangalay
Hindi aaray
Hindi mapapagod na pag-ibig ay ialay
Dahil ako pa rin naman ito.
Ako pa rin ito.
Photo Source: Pixabay
To give
your witness voting decision, visit https://steemit.com/~witnesses and type in "surpassinggoogle" in the second box as a proxy.
