Batang Musmos

Simula noong ika'y isinilang,
Kaligayahan sa tahana'y hindi mapantayan.
Mumunti mong katawan,
Kandong ni inang at pinaka-iingatan.

Bilog mong mga mata,
Matambok mong mga pisngi,
Ikaw ay isang anghel,
Balot sa lamping kulay kahel.

Isa, dalawa, tatlo, apat
Tila ang oras ay hindi na sapat
Kay bilis ng panahon
Sa Disyembre'y maglilimang taon

Ngayong lumalaki ka na,
Puso mo sana'y maging busilak at masaya.
Pagkat ang tanging nais ng iyong ina,
Buhay mo'y maging mapayapa at masagana.