Mabuhay mga makakatang kabayan! Narito po ang aking lahok at opisyal na entry para sa paligsahan ni ginoong Hive account@jassennessaj na pinamagatang "Word Poetry Challenge na may temang "BAGYO"

"BAGYO"

https://pixabay.com

Sumapit na ang panahon ng tag-ulan,
Umihip na ang hangin mula sa kanluran.
Inaabangan ang kanyang pagbabalik,
Inaantabayanan ang kanyang pagdaan.

Ang madla ay kinakabahan sa mararanasan,
Dahil ang bisita ay mahangin at may kalakasan.
Ibayong pag-iingat ang dapat isaalang-alang,
Dahil una sa lahat ang kaligtasan.

Kalangitan ay unti-unting dumilim,
Kasabay ng pagdampi ng basang hangin.
Ang kanyang bugso ay mala ipo-ipo,
Hudya't na may paparating na "BAGYO".

Sa pagbuhos ng malakas na ulan,
Kasabay na tumangis ang karamihan.
Ang buong nayon ay di-nakaligtas sa baha,
Maraming tahanan ang nawasak, nasira.

Hindi niya nais ang manira,
Hatid niya ay magbigay ng biyaya.
Hindi niya nais kumitil ng buhay,
Hangad niya ay magbigay buhay.

Dala niya ay tubig ng pag-asa ,
Sa mga hayop na sakanya ay umaasa.
Ulan na dadampi sa tigang na lupa,
Upang pagyamanin ang yamang-lupa.

Marami ang nagalit at naiinis,
Sa huli nagpasalamat sa kanyang pag-alis.
May nagpasalamat sa panibagong bukas,
Ang iba sa panibagong pag-asa sa hinaharap.

iba't-ibang damdamin ang nasaksihan,
Mamamayan ay nagbuklod at nagbayanihan.
Ikaw, ako, tayong lahat ay nagtulungan,
Ipinakita ang diwa ng pagmamahalan.