Word Poetry Challenge #7 : Simbahan

Pinagmulan

Tahanang maituturing ng mga Kristiyanong nagkakaisa,
nananatiling matatag lumipas man ang ilang dekada,
kasaysayan ng pagkakapatiran ng pananampalataya,
pook pasasalamat sa mga ipinagkaloob na biyaya.

Yaong apat na sulok na nagsilbing saksi,
ng bawat pusong tapat at handang magsilbi,
pangako ng pag-ibig sa dambana na walang hanggan,
sa hirap at ginhawa, maging kabilang buhay man.

Apat na sulok na nagdiriwang sa pagdating,
ng bagong anghel, bagong Kristiyanong pagpapalain,
Naturang sulok ay naging saksi rin sa bawat paglisan,
hinagpis, pagtangis ng mga mahal na nagpaalam.

Sa ating pagkakalugmok ay nananatiling bukas yaong pinto,
Upang tayo'y papasukin at sa katahimika'y ating mapagtanto,
Na sa tahanan ng Panginoo'y naroon ang ating Ama,
Upang dinggin ka't bigyan ng kapayapaan at bagong pag-asa.