ဖူးရောင်နေသော နေရာများ
၁။ ။ ခေါင်းလောင်းထိုး အမှိုက်သိမ်းစံနစ်
တပတ်တခါတောင်ပုံမှန်မလာ၊ လာရင်လည်း ခေါင်းလောင်းမထိုး၊ အမှိုက်သွန်နေတုန်း အတင်းမောင်းပြေးနေတဲ့ အမှိုက်ကားတွေကြောင့် အမှိုက်ကားစောင့်ရတာကိုက အလုပ်တလုပ်ဖြစ်နေတယ်။ စီးပွားရေးကျပ်တည်းကြလို့ အချိန်ပိုရယ်လို့မရှိတဲ့လူထုက ဘယ်တော့လာမယ်မသိတဲ့ အမှိုက်ကားကို စောင့်နေမှာမဟုတ်ပါဘူး။ အမှိုက်ပစ်စရာနေရာ သတ်သတ်မှတ်မှတ်လေးလုပ်ပေးပြီး၊ အမှိုက်ကားက အဲ့ဒီနေရာကအမှိုက်ကိုပဲသိမ်းမယ်ဆိုရင် ပစ်မဲ့လူကလည်းအမှိုက်ကားစောင့်စရာမလိုသလို သိမ်းမဲ့သူတွေကလည်း တမြို့လုံးပတ်မောင်းနေစရာမလိုတော့ဘူး။
၂။ ။ ရေမြောင်းများ ရေစီးရေလာကောင်းမွန်ရေး
ရေမြောင်းတွေ ရေစီးရေလာကောင်းဖို့ဆိုတာက အမှိုက်သိမ်းစံနစ်နဲ့ ပက်သက်နေမှာပါ။ အမှိုက်ကားမလာ၊ အမှိုက်ပစ်စရာနေရာမရှိ၊ နောက်ဆုံးရေမြောင်းတွေထဲပစ်ကြရင်း ရေမြောင်းတွေပိတ်၊ မိုးလေးနည်းနည်းရွာတာနဲ့ ရေတွေလျှံ။ လမ်းဘေးရပ်နေတဲ့ကားတွေဆိုင်ကယ်တွေကို ရပ်နားခွန်ဆိုပြီးလိုက်ကောက်နေရုံနဲ့ တာဝန်ကျေပြီလို့ မှတ်မနေကြပါနဲ့ဗျ။
၃။ ။ အခွန်အခ များပြားခြင်း
ကျွန်တော့်အဖြစ်ကိုပြောပါမယ်။
လုပ်ငန်းစပြီဆိုတာနဲ့ စာချုပ်ချုပ်ရတယ်။ အဲ့ဒီမှာ တံဆိပ်ခေါင်းခွန်။
အရောင်းအဝယ်ကိစ္စဖြစ်လေတော့ ကုန်သွယ်မှုပေါ့ဗျာ။ အဲ့မှာ ကုန်သွယ်လုပ်ငန်းခွန်။
အလုပ်တွေပြီးတော့ ငွေဝင်ပြီ၊ ပိုက်ဆံရပြီလေ။ အဲ လာပြီဗျာ ဝင်ငွေခွန်။
ဝင်ငွေခွန်ဆောင်ပြီးပြီမို့ လက်ကျန်ပိုက်ဆံက အရပ်အခေါ် "ငွေဖြူ" ပေါ့ဗျာ။ "ငွေဖြူ ခေါ် အခွန်ဆောင်ပြီးသားပိုက်ဆံ" ကို ကျွန်တော်သုံးပါတယ်။ ဘယ်မှာသုံးလဲဆိုတော့
တခါတရံ စားသောက်ဆိုင်မှာဝယ်စားတယ်။ ဘာမှန်းမသိဘူး အခွန်တော့ ဆောင်ရတယ်။
ဖုန်းငွေဖြည့်တယ်။ လာပြီခင်ဗျ ကုန်သွယ်လုပ်ငန်းခွန်။
ဟိုဟာလေးဝယ်မယ်ဗျာ၊ ဘာခွန်။ ဒီဟာလေးဝယ်မယ်ဗျာ၊ ညာခွန်။ တော်ပြီ မဝယ်တော့ဘူးဗျာ။
ရွှေဝယ်စုတာ၊ ကားဝယ်စီးတာမပါသေးဘူး။ ကိုယ်လည်းမဝယ်နိုင်သေးပါဘူး။ အခွန်အထပ်ထပ်ဆောင်ပြီးမှရလာတဲ့ "ငွေဖြူ" ကိုသုံးနေပေမဲ့ "ငွေဖြူ"ပေါ် အခွန်ထပ်ဆောင်နေရတယ်။ အခွန်ထမ်းတဲ့ နိုင်ငံကြီးသားတယောက်ဖြစ်ချင်ပါတယ်။ အခွန်လည်းထမ်းပါတယ်။ ဒါပေမဲ့ လက်ရှိခံယူချက်ကတော့ ကားဝယ်မလား၊ Without ပဲဝယ်မယ်။ ဘယ်မှာမှမရှိတဲ့ အထူးကုန်စည်ခွန်ဆိုတာတွေကို "ငွေဖြူ"နဲ့ ထပ်မပေးချင်တော့ဘူး။ အမှိုက်ကားမလာ၊ ကိုယ့်အစီအစဉ်နဲ့ကိုယ် အမှိုက်ပစ်နေပေမဲ့ အမှိုက်ခွန်ဆောင်ရတယ်။ ရေခွန်၊ မီးခွန်၊ အကုန်တူတူပဲ။ လေရှူခွန်နဲ့မြင်ကွင်းခွန်ရယ်လို့ မကောက်သေးတဲ့အတွက်တော့ ကျေးဇူးတင်ပါတယ်။ တိုးလာတဲ့အခွန်နဲ့ ရလာတဲ့လူနေမှုဘဝက ပြောင်းပြန်အချိုးကျနေတယ်။ ဝင်ငွေခွန်ကို စံနစ်တကျနဲ့ တိတိကျကျကောက်ပြီး ကျန်တဲ့အခွန်အခတွေကို ဖြုတ်ပစ်မယ်ဆိုရင် အခွန်မပိတော့ဘူးပေါ့ဗျာ။
ဘာမှသိလို့တတ်လို့ရေးနေ ပြောနေတာတော့အဟုတ်ဘူးဗျ။ အဲ့နေရာတွေက ရောင်ကိုင်းနေပြီ။ ဆီလေးလူးကြဦး။ အကျိုးဆက်တခုက ရောင်ကိုင်းနေရင် အကြောင်းတရားကိုသာဆီလူးပါဗျ။ သူခိုးလက်ကလွတ်လို့ပျော်နေတုန်း ဓါးပြလက်ထဲရောက်ရတဲ့ဘဝမျိုးမပေးကြပါနဲ့တော့။ မစားရ ဝ,ခမန်း၊ လူတယောက်ကို တိုက်တလုံး၊ ကားတစီးပိုင်ရမယ် မတောင်းဆိုပါဘူး။ အခွန်ထမ်းပြည်သူတယောက်က ရေလျှံနေတဲ့လမ်းပေါ်မှာ အမှိုက်မပစ်ချင်လို့ ပူဆာကြည့်မိတာပါ။ မြေအောက်မြို့တော်ကြီး နောက်မှဆောက်ပေးပါ။ မြစ်ကြီးကိုလည်း နောက်မှရွှေ့ပါ။ ပြည်သူတွေအဆင်ပြေဖို့ ဒါလေးတွေတော့ အရင်လုပ်ပေးကြပါဦးဗျာ။
Ko Myintmo
